Почитувани читатели, 

 

Во вашите раце се наоѓа бројот 3-4 за 2011 година создаден со многу труд и голем енту-зијазам. Во една пригода имам изјавено дека во Македонија да се бавите со уредништво е исто како да сакате да се спротивставите на Земјината тежа и да сакате да останете во позиција на бестежинска состојба. Колку и да се трудите да направите нешто напредно и вредно, секогаш постојат репулсивни сили кои ве демотивираат во процесот на создавање на квалитетно списание. Некако како да не се сложуваат коцките во мозаикот на оние кои треба да пишуваат и да објавуваат, на оние кои треба тоа да го издадат и на крај на оние кои треба тоа да го прочитаат. Се добива впечаток дека сето тоа е во една голема несразмерност. Со луѓе кои постојано флуктуираат во издавачката канцеларија не можете да очекувате врвен интернационален квалитет, туку ќе мора да се задоволите со локални или во најголема мера регионални успеси. Добивањето на толку посакуваниот фактор на влијание изгледа многу далечен во такви услови. Овде сакам да се заблагодарам за придонесот во последните неколку броја на јазичниот редактор по македонски јазик доц. д-р Ратко Дуев и секретарот на редакцијата Ангелка Велкоска. 

Тоа што го карактеризира периодот од минатиот број досега, а е вредно да се спомене, е секако потпишувањето на договорот со издавачката куќа „Версита“ од Полска, која стана електронски издавач на списанието. Бројот на индексирања и апстрактирања на списанието се зголеми и ја достигна бројката 44, што секако претставува број за почит. 

При крајот на месец август, на Институтот за дефектологија во рамките на континуираната едукација на постдипломците, беше одржан семинар на тема: „Рана интервенција – превентива и предизвици во раното детство“, така што во наредниот број очекуваме да бидат објавени неколку трудови од реномирани професори од Германија и Австрија, а кои беа предавачи на семинарот.

Што ќе можете да прочитате во овој број? Колегата од Романија Гергут се претставува со трудот: „Саморегулативни стратегии за орална комуникација кај децата со оштетен слух“. „Сензитивна комуникација со деца со умерена интелектуална попреченост преку емотивно-експресивните принципи на ICDP програмата“ е насловот на трудот на авторите Нергис-Акѓун и Петров. Во делот медицински третман се поместени содржини кои ги обработуваат ризик факторите кај деца родени со асистирано оплодување и граматичко синтактичкиот развој кај деца со специфични јазични нарушувања. Следува рубриката психолошко педагошки преглед каде што авторката Косевска на многу пластичен начин ни објаснува за системот на вредности кај глувите адолесценти од Полска. Во следната рубрика можеме да се запознаеме со значењето на групната терапија во третманот на пелтечењето. Во делот искуства и новини од светот претставени се одредени методи за учење помогнати од соученици во посебното обра-зование во Нов Зеланд.

Вестите и информациите добро ги покриваат настаните во секторот на специјална едукација во државата и регионот. Имаме прикажано апстракт од еден одбранет магистерски труд и повторно тука се задолжителните и неодминливи делови: библиографија, листа на рецензенти и индекс на автори. 

Можеме да претпоставиме дека овој број ќе го разбуди вашиот интерес да го прочитате и несебично ја споделите содржината на истиот со вашите колешки и колеги. Во Македонија купувањето на списанија с? уште претставува мислена именка, но затоа тука сме ние да ја подигнуваме културата за читање на стручно научни списанија. Ги очекуваме вашите забелешки и коментари на адреса на редакцијата, а тоа е во насока на подобрување на квалитетот на содржините во списанието.

 

 

Со почит,

Главен и одговорен уредник

Проф. д-р Владимир Трајковски