Read: 7074

Луиза ВЕЛЈАНОВСКА

РАНОТО ОТКРИВАЊЕ НА РЕФРАКЦИОНИТЕ АНОМАЛИИ
И СТРАБИЗМОТ, УСЛОВ ЗА ДОБАР ВИД

                Во современиот живот кога техниката доживува прогрес и кога квалитетниот вид е услов за работа со прецизните машини, раната превенција во областа на очната патологија е неопходна.
Раната детекција на рефракционите аномалии и страбизмот во детската возраст го спречуваат инвалидитетот од истите.
Проблемот со слабовидноста и рефракционите аномалии е превентивен проблем и до колку ќе се започне со рано лекување дотолку е посигурно дека нема да се воспостават патолошки сензорни процеси.

Испитаници и методи на работа

Во ”Одделот за превентивна здравствена заштита на доенчиња, мали и предучилишни деца” во Битола се врши систематско следење на растот и на развојот на децата од раѓањето до 6-годишна возраст. Во систематските прегледи на 3, 4 и 5 год. возраст е вклучен и систематски преглед на видот што се извршува во ”Кабинетот за ортооптика и плеоптика”.
Со цел да се анализира застапеноста на рефракционите аномалии и страбизмот, проследени се 3 годишта на деца родени во 1990, 91 и 92 год. од 2-5-годишна возраст. При работата се користени советувалишните картони.

Резултати

Од вкупно 1.634 деца родени без ризик со систематски преглед на видот биле опфатени 1.214 деца од кои 937 (57%) соработувале при прегледот.

Хиперметропијата е еднакво застапена кај машките и женските деца, додека страбизмот е за 1,2% повеќе присутен кај женските деца.

Кај 75% деца хиперметропијата е дијагностицирана на 3 годишна возраст, кај 19% на 4 годишна, а кај 5,5% на  5 годишна возраст.

Кај 55% деца страбизмот е дијагностициран на 3 годишна возраст, кај 38% на 2 годишна  и кај  6% на 4 годишна возраст.
Проследена е и застапеноста на рефракционите аномалии и страбизмот кај децата од истите годишта родени со ризик (S.C., V. Ehtr., ASPH, Prematuritet) и истите се застапени со поголем процент.
Од вкупно 253 деца соработувале 186 деца. Од нив 6 деца односно 8,3% се со хиперметропија и 4 деца односно 4,8% со страбизам.
Успехот на рехабилитација на страбизмот зависи од тоа колку долго време има поминато од почетокот на страбизмот до првиот контакт со лекарот-офталмолог. Ако детето добие страбизам од 18 месеци, а почне да се лекува на 18, 20 и 21 месец, односно до 3 месеци по избивањето на страбизмот, скоро сигурно дека нема да дојде до амблиопија поради гарантираната рехабилитација.

Заклучок

Можеме успешно да се бориме против сите видови на страбизам и амблиопија под услов да се откријат што порано и веднаш да се почне со стручно третирање. За да се изврши масовно откривање на рефракционите аномалии, амблиопијата и страбизмот е потребно да се изврши систематски преглед на децата во периодот од мало дете (1-3 год.) и децата во периодот од предучилишното дете (4-6 год.).
Само со здружена работа на лекарот од општа практика, педијатарот и офталмологот и добрата упатеност на родителите за слабовидноста и нарушувањата на бинокуларниот вид, како и за можностите за нивно спречување, може да се избегне огромниот број на видно хендикепирани граѓани на нашата земја.